سون یازیلاریم

آفتاب آذربایجانلا دانیشیغیم





آزادلیق

وور غون

چرچیوه سین ایشلئین
گئجیل اوشاغی

 

 جان کوینه ییم !

 

 

 

جان کوینه ییم!

سن سیز یاشاماق

بوتورپاق دا

وطن سیز یاشاماق دیر ...

سئوگین سومویومه دوشوب

سنسیز یامان اوشویوره م...!

+ یازیلیب دیر: سه شنبه نوزدهم اردیبهشت 1391ساعات 11:52   گونش  | 

---

آفتاب آذربایجانلا دانیشیغیم

 

 آفتاب آذربایجان درگیسینین ۶۲-۶۱-جی ساییندا چاپ اولان مصاحبه

آذربايجانيميزين چاغداش گنج قادين شاعيرلري سيراسيندا چئشيدلي بير پوئزيا ميراثينا يييه اولان رقيه خانيم وعيدي (گونش)، 1365- نجي ايلين ايكينجي گونونده بايرام عطيرلي، ياز نفسي بير گونده، شاعيرلر دياري، ماراغا شهرينده ايشيق دونيايا گوز آچيب. شعره حياتينين بير بؤلومو كيمي باخاديقدا، دويغولاناندا اونونلا قول- بويون اولور. بو استعدادلي گنج شاعير ایکی ایلدن بري اؤیکو ده یازیر. ادبيات ساحه‌سينده يئنيليك آرخاسيندا اولدوقدا بير آن مطالعه‌دن قالمايير. او ايندي دوغولدوغو شهريده حسابداري رشته‌سينده، بيليم يورد اؤيرنجي‌سيدير بو گونه كيمي ، تورك ديللي درگي‌لرين بير نئچه‌سينده شعرلريندن چاپ اولونوب. اينديسه اونونلا صميمي بير دانيشيغيميزي اوخوجولاريميزلا پايلاشيريق.

احد فرهمندی

خانيم وعيدي آفتاب آذربايجان درگيسي‌نه خوش گلميسيز ! بويوراسيز نئچه ياشيزدان شعرايله سوركلي ايلگيز وار؟

اون‌بئش ياشيمنان شعرايله قيريلماز ايلگيم وار.

يازديغيز ايلك شعرينيز ياديزدادير، يوخسا ايتيريب باتيرميسيز؟

منجه فيكردن گلن دَيَرلي سؤز ايتيب باتماز. يازديقلاريمي مطلق ساخلارام. ايلك يازديغيم شعر «كور اوجاق» شعري‌دير.

عايله‌نيزده سيزدن باشقا شعر و صنعت‌له ايلگيسي اولان وارمي؟

آتا- آنام شعر يازماق باشارمازلار، آمما دانيشديقلاري، منه شعر كيمي گلر. مندن باشقا باجيم خديجه و قارداشيم آرتان شعر يازيرلار.

بئله‌ليكه بير شاعيرلر توپلوسو عايله‌ده ياشاييرسيز؟

(گوله- گوله) نه دئييم آخي!

شعرين موسيقي ايله دانيلماز باغليليغي اولدوغو اوچون، موسيقي قونوسونا نئجه ياناشيرسيز؟

منجه شعر ايله موسيقي بير- بيريندن آيريلمايان، بير جان‌دير ايكي بدن‌ده. موسيقي‌ني چوخ سئودييم اوچون دؤرد ايلدير آرديجيل بو هنر ساحه‌سينده چاليشيرام.

هانسي سازلارلا ايشله‌ييرسيز؟

اوچ ايل ويلن ايشله‌‌ميشم، بير ايلدي ده ضرب ايشله‌ييرم.

عايله‌نيز سيزين هنريزي نئجه قارشيلاييرلار؟

منيم ايلك تشويق ائدنلريم آتا- آنام اولوب، آتامين اوخودوغو باياتي و ماهني‌لار، مني آرتيق موسيقي‌يه ساري چكير.

شعرده به‌ين‌دييز قاليبلار‌دان دانيشين، دئمك يازديغيز شعرلر عموميتله هانسي قاليبي داشييرلار؟

من سربستي به‌يه‌نيرم و عموميتله سربست قاليبيندا شعر يازيرام.

نه‌دن سه سربست؟

اصلينه باخساز سربست يازماق چتين‌دير. اما سربست قاليبي آزادليغا اولان حيس‌لريمله آرتيق اويغوندور.

سيزجه شعر نه دئمكدير؟

شعر الله وئرگي‌سي‌دير. شاعير ايچ دويغولاريني چئوره‌سينده اولان چئشيدلي اولايلار و طبيعت‌دن آلديغي گؤزلليكلرله بير- بيرينه قووشدوروب يازيغي سؤزلر شعره چؤنور. باشقا سؤزله عموم خالق دئيه بيلمه‌ين سؤزلر، صنعت‌كار قلميندن آخاندا شعر اولور.

شعرلريزده نه‌‌لردن الهام آليرسيز؟

چوخلو آنامين دانيشديقلاري، گاهدان حساس روحوم اينجی ين بير اولايدان، بيرده ياشاديغيم محيط‌ين كوتله‌سيندن بوللو الهام‌لار آليرام. آنجاق ياشاديغيمي يازيرام.

هانسي شعريزي آرتيق بَيه‌نيرسيز؟

شعرلريمين چوخونو بَيه‌نيرم، ان چوخ سئودييم شعري هله يازماميشام، اما سواليز جوابسيز قالماسين دئيه، «وورغون» شعريمي داها آرتيق سئويرم.

شعرلريزده هانسي قونويا چوخ اؤنم وئريرسيز؟

مختلف قونولاردا شعر يازيرام، هله‌ده بيلمه‌ييرم نه دن شعر قورتولاندا بيردن بيره سئوگي شعري اولور.

بو گونه قده‌ر اؤلكه‌ميزده كئچيريلن شعر ياريشلاريندا اورتاقليق ائتميسيزمي؟

بلي، ماراغادا كئچيريلن «آلما» آدلي شعر فستيواليندا شركت ائتميشم.

بو ياريشدا بير مقام دا الده ائده بيلميسيز؟

بيرينجي مقامي اله گتيرديم و «ياغمور باجيلاري» آدلي شعريم سئچيلدي.

شعردن باشقا ادبياتين هانسي قوللاري ايله علاقه‌نيز وار؟

ايكي ايلدن بري حكايه  و اؤيكو ده يازيرام.

كتاب اوخوماغا نه قدر واخت قويورسوز؟

هامينين كتاب اوخوماغا احتياجلي اولدوغونا ايناميم وار،‌ چونكو چؤره‌ك يئمك كيمي بير نيازدير. منجه كتابسيز ياشاماق مومكون دئييل. تام بوش واختلاريمي كتاب اوخوماقلا دولدورورام.

بو ياخينلاردا «سئوگي كؤرپوسو» آدلي شعر توپولوسو كتابيز بازار گليب، سيزه اوغورلو اولسون دئيه، بويورون ايلك اثريز اوخوجولار طرفيندن نئجه قاريشلاندي؟

اينانميرديم بو قدر دوستلار طرفيندن قارشيلانسين، ‌بوللو تبريكلر آليرام. دوستلاردان بير نئچه‌سي كتابا تنقد يازماق سؤزونو وئريبلر. دگرلي اوخوجولاريمدان ايسته‌ييرم، گله‌جک‌ده كي اثرلريمي داها دولغونلاشديرماق اوچون اؤز تنقدي باخيشلاري ايله منه يارديم ائتسينلر.

ماراغا كئچيشدن بو گونه قدر ادبياتيميزا ديرلي شاعيرلر پاي وئريب، بوگون ماراغادا شعرين دورومونو نئجه گؤرورسوز؟

ماراغا شعر باخيمدان گوجلو بير شهردير. تبريك دئمه‌لي‌يم كي گنج‌لر ده شعره داها آرتيق ماراق وار و قادين شاعرلرين‌ ده شعرلرينده قادينليق ايزي قاباريق شكيلده گؤزه چارپير و بو سئوينديريجي‌دير.

اينديليكده نه ايشه مشغولسوز؟

بيليم يورد اؤيرنجي‌سييم. درسلر آرتيق واختيمي دولدورور. ائو ايشلرينده عايله‌‌مه يارديم ائتمكدن بويون قاچيرامارام.

سون سؤز اولاراق اوخوجولاريميزا نه دئمك ايسته‌ييرسيز؟

بورادان آفتاب آذربايجان درگيسي‌سينين بوتون چاليشانلاريندان بوللو تشكر ائديرم. انسانين ديريليينه معنا وئره‌ن مطالعه اولدوغو اوچون بير كيچيك سوي‌داش كيمي هاميني مطالعه‌يه چاغيريرام. و سون سؤزوم بو كي آتا- آنام و آرتان قارداشيمدان منيم ايلك اؤيرتمنيم اولدوقلاري اوچون چوخلو تشكر ائديب، بيرده فرهمندي جنابلارينا سايقيلاريمي بيلديريرم.

سيزه‌ده باشاريلار آرزو ائديريك.

  دانيشيق آپاران: احد فرهمندي- 25/11/90 تبريز

+ یازیلیب دیر: سه شنبه بیست و نهم فروردین 1391ساعات 23:16   گونش  | 

---

 

 

  سوسماغیم

  آصلا بوغاز یاراسی دئییل !

              سئوگیلیم ! دیلِِِ،  

                                     یا 

                                           را

                                             سی دیر ...!

+ یازیلیب دیر: سه شنبه بیست و دوم فروردین 1391ساعات 0:23   گونش  | 

---

 

سالخیم سویود

 

 

 

گون باتدیقجا

آریقلاییر کولگه میز

گئدیریک...

تانری  ـ  من

چیین لریمیزین بیر بیرینه دیمه سینده ن

 اوره ک له نیر بالتا باخیشلارین

یارا ـیارا  اوره ییمی

بیله ـ بیله ، بیله ییمی

یاریر بو آخشام

ساچلاری الینده

               سانکی

سالخیم سویوده چئو ریلمیشم من!

+ یازیلیب دیر: جمعه بیست و هشتم بهمن 1390ساعات 7:46   گونش  | 

---

گوبه لک

 

 

بیر یازگئجه سینده

گوروشدولر ایکی بولود

اوپوشدولر ...

دیکسیندی یئر

اوچوخلا دی دوداغی

ایندیسه گئجه نین قارا ساپیندان

سحرین آغ ساپینا قدر

 اوپوشدن دوغولان بیر جوت گوبه لک

سنه تاپینیر( عیبادت ائدیر) ...!

+ یازیلیب دیر: یکشنبه چهارم دی 1390ساعات 7:51   گونش  | 

---

ایکی آغاج

 

بيز ايكي آغاج كؤلگه‌سييك

لاپ ياخين، ان اوزاق

ايكي یالقیز

ايكي چيلپاق

آخ!!

باغريميزدا باغداش قوروب

قارغا قوزغون شوٍبهه‌لر

يئيير گؤزموزو

دئشير كؤكسوموزو

كؤك آتا بيلمه‌ييرباخيشلاريميز

قوجاغيميز

بور- بوجاغيميز

يابانجي يئريدير

ديلسز_آغيزسيزسارسيليريق

هر باتي دا داردان آسيليريق.

+ یازیلیب دیر: چهارشنبه چهارم آبان 1390ساعات 11:24   گونش  | 

---

سني اؤزومه اؤيره ده جيم!

قوش بالاسين

په پييه اؤيره دن كيمي

سني ده اؤزومه اؤيره ده جيم!

سؤزونو سؤزومه

ديليني ديليمه

سني

آري تك شانيما

گيزلي -گيزلي آليشان درديني جانيما

اؤيره ده جيم!!!

گئدر ؛گلمز بو دلي گونلر بير داها

يولوموز آيري دوشسه ده

دوشمز ديليندن آديم

يانيق يئري كيمي

يئريم قالاجاق اوره يينده

اؤلوب ديري له جك سن

آلاجاق آللاه سني

تزه دن وئره جك!

اؤلوب ديري له جك سن.

+ یازیلیب دیر: چهارشنبه نهم شهریور 1390ساعات 7:22   گونش  | 

---

آزادلیق

آزادلیق

 

يوواسيز قويدو سني

دونيانين آجي- شيرين هاوالاري

اوشاقليغيندان اؤيرتدي

دليليك مشقيني

آزادليق بير قوش اولوب

قانادلاري آزديردي سني

گونو- گونوندن

دويون دوشدو گونلرين

سئوگیلیم!

سن اكن آغاجلار اينديسه

كوره‌كلييه كسيلير

ووروب باشينا

آلا گؤزلري

باشينا بلا گؤزلري

اليندن آلاجاق اوره‌ييني

آنجاق

كؤرپه قوش تك

چيرپينماغين قالاجاق اللرده.

 

Latıncesini burada oxuyun

+ یازیلیب دیر: دوشنبه بیست و سوم اسفند 1389ساعات 10:9   گونش  | 

---

بورا جهنم!

اورتاسی اوره ییم

چلیک سیز قوجا آداملاری

 سوگی لری دیلنچی

هئی

بو گون 

       آه لار

باغرینی دلجک دنیانین

گوزلرین آغزینا

آغزینی گوزونه تیکه جک لر 

 بوغازین اوزه جک لر 

        قیزیل ـقیزیل

          آغچاـ آغچا      

 سویولاندا دریسی دنیانین....

+ یازیلیب دیر: جمعه بیست و نهم آبان 1388ساعات 12:58   گونش  | 

---

وور غون

  

بو شعری اتحاف ائدیرم گونش دن پارلاق دان اولدوزو،

ایلقار جنابلارینا  

   آنام دئیر دی  وور غون وور سون 

           بیلمزدیم نه دئییر

                وور غون لوق

                    نه بیلیم نا خوشلوق

                      نه بیلیم یوخلوق

                            نه بیلیم بلا

                گوز لریمین  زینه ـ زینه سوز مه سی

                         یاناقلاریمین چالالا رینا دولماسی

                   

                       اوره ییمین  دیدیم ـ دیدیم دیدیلمه سی

             باخیشلارین لا

             دیزلریمین تیرـ   تیر اسمه سی

               سانکی بو گئجه وور غون وور دو

                       ائله آنا مین او دوعا سیلا

                               

                     سئو گی یه  دوشدوم  ...!!

......> latince burada oxuyun

   

+ یازیلیب دیر: دوشنبه چهارم شهریور 1387ساعات 18:55   گونش  | 

---