بير صندل فاصيله

بير ، ايكي ، اوچ  مندن بير آدديم ، ‌يالنيز بير صندل بوْيدا آراسي وار ايدي . آدديملارينين سسي گوپون كيمي باشيما ائنيردي . نفس‌لريمي دَريرديم . كيچيك گؤزلو قارشلاري توْم ، قاش- قاباقلي بير كيشي منه ساري گليردي . اوره‌ييم چيرپيناناراق اَللريمي اوزومه اؤرتوك ائتميشديم . س ... سس ؛ بالتا سسي ، تيتره ييش ، دؤشمك ، ايچه ريمي پاتلاديردي .

تخته صندل  الين چنه سينين آلتينا قوْيوب فيكرده دالاراق : "انسان هر آن اؤلمكده ، يانيلماقدداير. " دئدي .

سوُسدوم ، اؤلوم ايچيمده نفس آليردي . اوْنون ياخشي سؤزلري ايله اوره‌ك توْختاقليغي وئرمه‌سي مني بئزيكديرميشدي .  گوْر باگوْر اوْلموش كيشي بيله زوغلاريندان  منه ساخلامادي  . نه اوْلاردي يئرده منه تاي قيزديرما  توُتوب دوْداقلاري جيريليب مني اوُداردي ، اوْندا دينجه لرديم .

درد اليندن يازيقلاييب گؤزلري درينه دوشموش تاختا صندل كيرپيلرين يوُموب : " دئمه دين نه اوْلوب ؟ نه دن اوره يين شيشيب ، پاتلايير ؟ " دئييه سوْروشدو .

باخيشي طَنَف كيمي بوْغازيمي سيخيب سؤزلري قيريق شوشه اوْلوب اوره ييمه باتيردي .حوزنولو سسله : " اوْ،اوْ كند وورغونوايدي ،‌سئويردي يئل اَللرين توُمارلاييب اؤپسون " دئديم  . سونوندا دا قوُجاقلاييب هؤنكورتو ايله آغلاديم .

سحر ائركن ، چوْخلو قارقالارين گؤيده اوُچماسي ايله  آداملارين اوْيان - بويانا قاچماسييندان شاشقينلاشميشديم . يئرلي آداملاردان بير خسته‌لي‌يين یایقینلاشماسین ائشيتميشديم . هامي اؤلدوروجو ايچ ويروسلاريندان ساري ياشاييشلارين اوْووجلارينا آليب قاچماقدايديلار . هاوادا آجي آيريليق دادي ياييلميشدي . يئر بوتون دَليلگي ايله مني قوجاقلاييب وار گوجو ايله  سيخيردي . تاختا صندلي گولمك توُتدو ييخيلا – ييخيلا :

 " سن اؤزومدن اوْلدوقدا سنه بير ايش گؤره بيملرم " دئدي .

آغلاماغا باشلادي . ايچيمي يانديرانلار ، سئوگي ، نفرت ، ييرتيجيليق اوْلموشدو . رنگيم قيزارميشدي . دؤزومسوزلوكدن  اؤزومو يئره چيرپيب گؤوده‌مين آغيرليغين اوْنا بوُراخديم . قالخيزماق ايسته دي ؛ قوْيماديم .

يئني دوشونموشدوم ؛ ظاهري عدالتين اليندن توره نن  جنايتدن ساري يئرين چكديگي  نفس خسته لر نفسينه اوخشايير .دونيا  اؤز باتلاقيندا چابالاييردي .

گنج ياشيل بوُداقلارين سسيني باشيم اوسته ائشيديرديم . سوْيوق يئللرين الي ايله چيلپاقلانميش آغاجلارداها دا منه ياخينلاشيرديلار.

اوزو داغلاشميش يئر : " اگر تئز دئسه ايدين ... " دئيه رك سؤزون كسدي . يئرين قارني سَسه دوشدو . بَللي ايدي آجيندان قبير بوْيدا آغيزلار آچيب ايستر- ايسته مز هاميني اوُدماق ايسته يير .

" اَكيليب ، گونش ده‌يمز ياشيلاشمايانلارين يانينا گؤندره‌رديم ؛‌هاميني دئييرم " دئدي . سوْنرا اوره‌يي يوُخالاشيب مهربانجاسينا : " قايغين اوْلماسين " دئدي .

بوغازيمدا بوْغولان سسله :" اوْندان اوُزاق قالماق منه اؤلومدور" دئديم .

درد اليندن يازيقلاميش تاختا صندل خيس – خيسا دوشوب ، چاتلاياراق آغزينين سوُيون ائشييه توپوروب : " ائله ايندي ده اؤلمكده سن ، سس سيز اؤلومو اوُنوتموسان " دئدي

نه اوْلدوسون يئني باشا دوشموش يئر دوْداقلارين ترپتديكجه سؤزلر ديشارييا اوُچوردو : " ياني نه ؟ نه دئييرسن؟ هئچ بيليرسن سنسيز يئر اوچون ؛ دونيانين سوْنو دئمكدير ! " دئدي .

سوسماق يئترلي دير دئديك ،‌ جانيما قوْرخو اوْتوروب تيتره‌ييرديم .دوداقلارين ترپتديكجه سؤزلر ديشارييا آتيليردي . قورخو زوغلاريما قد‌ه‌ر ايشله‌ميشدي ، سيزيلتيلاريم قارقالارين سسينه قاريشاراق ايكي سسي بير- بيريندن  آييرد ائتمك گوجون مندن آلينميشدير . هر نفس آليب وئرديييمده: " كيمم ؟ هاردان گلميشم ؟ بيلميرم ، نييه بو وارليقدايام ؟ نه دن انسان اولموشام ؟ هاي ... سيز منه دئييه بيلرسيز مي ؟ " دئييه اؤزومدن سوْروشدوم .

كيمسه‌ دن سس چيخمادي ، هر اوْلايين (حادثه) بيلر- بيلمز اوز وئرمه‌سينين سَببين يئرله صندلين اَلي ايله اوْلدوغون  بيليرديم . گوندوز قارقالار بوْياغينا چئوريلميشدي  مسموم ائديجي عدالت كنده دوشموشدو . چيغيرتي دوْلو سسلر گلديكده ، تاختا صندل وار گوجو ايله ديزلريمدن ياپيشميشدي . قورخو دولو ايچيم تيتره ييردي . آجي بير نگرانليق اوره‌ييمي يئييردي . اوُيدوم هاچان مني يوُخو آپارماغين داها بيلمه ديم  .

اينجه ، گؤي بوياق ايپه اوْخشار ، دامارلاري دريسينين آلتيندان گؤرونن خيردا سوموكلو بير الي  ،   اوزومون اوستونده  حس ائدركن ، قوخوسونون يئني ليگين دوُيوب يوُخودان آييلديم .

خورما آغاجي هله جاوان ايدي ، بوُداقلارين بوينونا سارديم . اوزونده‌ن اؤپدوم ، دويماييب يئنه ده اؤپدوم . اؤزمه گلديكده تاختا صندل يوخ اولموشدور . تاختا صندلين هارا گئتمه سين بيلمك اوچون‌: " تاختا صندل هاني ؟ اونا نه اولدو ؟ " دئيه يئردن سوروشدوم .

سوْرغومون جاوابيندا يالنيز قوُلاغيما ده‌ين : " يئله قووشدو اؤز باشينا بلا گتيرمه سين اؤنجه دن بيليرديم . سونوندا دا اؤز ايشين گؤردو" سؤزو اولدو ...‌.......

                                                                         سون